Aug2007
జర్నలిస్ట్ గా కుటుంబరావు
Kodavatiganti Kutumba Rao
పత్రికల గురించీ, వాటి సాహిత్య, సామాజిక పాత్ర గురించీ, జర్నలిజంలోని కష్టసుఖాల గురించీ కుటుంబరావుగారు 1941-79 మధ్య కాలంలో రాసిన 18 చిన్నాపెద్ద వ్యాసాలు విరసం ప్రచురించిన సంస్కృతి వ్యాసాల సంపుటిలో ఉన్నాయి. ఇందులో ఆయన అభిప్రాయాలూ, అనుభవాలూ, ఉద్దేశాలూ అన్నీ ద్యోతకం అవుతాయి. ఆ విషయాలను ఆయన మాటల్లో తెలుసుకోవడమే బావుంటుంది కనక ఇక్కడ ప్రస్తావించటం లేదు.
నాకు తెలిసి ఆయన అనేక పత్రికల్లో పేరు లేకుండా రాసినవెన్నో ఉన్నాయి. చందమామలో చేరక మునుపే అందులో తండ్రి-కొడుకులు మొదలైన సీరియల్స్ రాశారు. యువ మాసపత్రికలో పనిలేని మంగలి అనే పేరుతో మంత్లీ కాలమ్ రాశారు. ఎన్నో బెంగాలీ నవలలకు తెలుగు అనుసరణలు చేశారు. కినిమా మాసపత్రిక నిండా ఆయన రచనలే ఉండేవి. తాము చెయ్యనివాటిని కూడా చేశామని చెప్పుకుంటూ, పబ్లిసిటీ, టీవీ ఇంటర్వ్యూలూ అనగానే పరిగెత్తుకొచ్చే ఈనాటివారి ధోరణితో పోలిస్తే పేరుకూడా చెప్పుకోకుండా అసంఖ్యాకమైన రచనలు చెయ్యడమే కాక, పత్రికల ప్రాచుర్యానికి తన బాధ్యత ఎంత ఉందో కూడా బైటకు చెప్పుకోని ఆయన వ్యక్తిత్వం ఈ రోజుల్లో విచిత్రంగా అనిపించవచ్చు.
ఆంధ్రపత్రికలో ఆయనతో పనిచేసినవారిలో నీలంరాజు శేషయ్యగారూ, కపిల కాశీపతిగారూ, దాసు వామనరావుగారూ, జయంతి కిరీటిరావుగారూ, వడ్లపట్ల ప్రసాదరావుగారూ, గోళ్ళమూడి రామచంద్రరావుగారూ, జలసూత్రం రుక్మిణీనాథశాస్త్రిగారూ, నండూరి రామమోహనరావుగారూ, సూరంపూడి సీతారామ్ గారూ తదితరులుండేవారు. ఆ తరవాత బాపు, ముళ్ళపూడి యుగం ఆరంభమయింది. వీరంతా వారపత్రికల ప్రాచుర్యాన్ని అంతకంతకూ పెంచుతూ పోగలిగారు. మా నాన్నగారికి కథా, నవలా, వ్యాస రచయితగా ఎక్కువ పేరు రావడంతో ఆయన జర్నలిజంలో చేసిన కృషి గురించి ఎక్కువగా ఎవరికీ తెలియలేదు. అలాగే ఆయన అనువాదరచనలు కూడా ఎక్కువ ప్రాచుర్యం పొందలేదు. రచయితగా ఆయన వ్యక్తిత్వాన్ని సమగ్రంగా అంచనా వెయ్యాలంటే ఈ అంశాలుకూడా వెలికి రావాలని నాకనిపిస్తుంది. ముఖ్యంగా జర్నలిస్టు అయినవాడికి సమాజంతో ఎక్కువ ప్రమేయం ఉంటుంది.
మా నాన్నగారు సినిమా జర్నలిస్టు అవతారం చాలించిన చాలా ఏళ్ళ తరవాత కూడా ఆయనను సకుటుంబంగా తెలుగు సినిమా ప్రీవ్యూలకు పిలుస్తూ ఉండేవారు. బి.ఎన్. రెడ్డి, కెవి.రెడ్డి, ప్రసాద్ తదితరులు ఆయన రాసిన పాత విమర్శల కారణంగా ఆయనను గౌరవించేవారు. బి.ఎన్. రెడ్డి తన సినిమాల గురించి మా నాన్న రాసిన రివ్యూలకు జాగ్రత్తగా స్పందిస్తూ ఉండేవారట. పెళ్ళి చేసిచూడు సినిమా విడుదల అయినప్పుడు మా నాన్నకు దాని పబ్లిసిటీ వగైరాలతో ప్రమేయం ఎక్కువగా ఉండేది. అయితే ఆ తరవాత కూడా గుండమ్మ కథ తీసే రోజుల దాకా చక్రపాణిగారు విజయా చిత్రాలకు కథ, పాత్ర చిత్రణ మొదలైన విషయాల్లో ఆయనను ఇన్ఫార్మల్ గా సంప్రదిస్తూ ఉండేవారు.
ఆధునికజీవిగా, జర్నలిస్టుగా తనకు ఆసక్తికరం అనిపించిన వివిధ విషయాలను మా నాన్నగారు పత్రికల్లో జనరంజకం చేసే ప్రయత్నం చేశారు. అది ఎంతవరకూ ఫలించిందో నేటి పాఠకులూ, పత్రికా విలేకరులూ నిర్ణయించుకోవాలి. ఈనాటికీ సర్క్యులేషన్ పెరగడానికి ఖచ్చితంగా పనికొచ్చే భక్తి విషయాలూ, బూతు కథలనూ కూడా జమిలిగా ప్రచురించే తెలుగు పత్రికలున్నాయని మనకందరికీ తెలిసినదే. ఎటొచ్చీ ఉత్తమ సంస్కారాన్ని నిజాయితీగా ప్రతిఫలించే పత్రికలకు డబ్బులు రాలకపోవచ్చునేమోగాని భావితరాలు మాత్రం వాటిని గుర్తుంచుకుంటాయి.
9 అభిప్రాయాలు »సాహిత్య వ్యాసాలు
August 3rd, 2007 at 1:05 pm
మీ నాన్న గారి ఓడిలో కూర్చుని నేను చందమామ చదువుకున్నాను. బి యస్ రామారావుగారు, దాసరి సుభ్రమణ్యం గారు, బాలశౌరి రెడ్డిగారు ఇంకా కళ్ళముందే కదలాడుతున్నారు. ఆ హాలు ఆ కుర్చి, వెనక రాక్ అందులొ చందమామలు, యువలు, వాటిలో వాపా, చిత్ర బొమ్మలు…
“ఆధునికజీవిగా, జర్నలిస్టుగా తనకు ఆసక్తికరం అనిపించిన వివిధ విషయాలను మా నాన్నగారు పత్రికల్లో జనరంజకం చేసే ప్రయత్నం చేశారు.”
మీకు గుర్తున్నతవరకు, మీకు తెలిసినంతవరకు ఆ జ్నాపకాల్ను నేటి వారికి అ
August 3rd, 2007 at 6:28 pm
జవాబివ్వాలంటే పై సందేశం అసంపూర్తిగా ఉంది. వ్యక్తి పేరు కూడా తెలియటంలేదు.
August 4th, 2007 at 12:33 am
పిల్లల పత్రికలు నా జీవితాన్ని ఎంతో ప్రభావితం చేసాయి, చక్కటి పునాదిని వేశాయి. ఇంతటి పుణ్యాత్ముని ఇంట పుట్టడమే కాకుండా, ఇలా సాహిత్య సేవ చేస్తున్నందుకు మీరు ఎంతో ధన్యులు. వందనాలు.
August 5th, 2007 at 1:19 am
…..మీకు గుర్తున్నతవరకు, మీకు తెలిసినంతవరకు ఆ జ్నాపకాల్ను నేటి వారికి అందించాలి. ఆ నాటి విలువలను వీరికి తెలియజేయండి.
కొ కు గారు మీ కుటుంబానికి మాత్రమే కాదు,
తెలుగువారందరివారు.
ముఖ్యంగా సాహిత్యభిమానులకు చెందినవారు.”
ఇది నా comment పూర్తి పాఠం.
అసౌకర్యానికి మన్నించండి.
August 5th, 2007 at 8:53 am
చందమామ గురించిన వివరాలు ఒక వ్యాసంలో రాశాను.
http://eemaata.com/em/issues/200601/33.html
ఇది చదివాక ఈనాడు పత్రిక వీటినీ, మరిన్ని విశేషాలనూ కలిపి మరొక వ్యాసం ప్రచురించింది.
అక్టోబర్ 2008 నుంచి అక్టోబర్ 2009 దాకా మా నాన్నగారి శతజయంతి సంవత్సరం గనక ఆయన రాసినవీ, ఆయన గురించి ఇతరులు రాసినవీ చదివేందుకు వీలు కల్పించాలని ప్రయత్నిస్తున్నాను.
అయితే ఏ రచయితకైనా ప్రస్తుతకాలంలో ఉన్న రెలవెన్సుని బట్టి పాఠకులు చదువుతారు. కృత్రిమంగా ఎవరిమీదా ఒత్తిడి తీసుకురాకూడదని నా ఉద్దేశం. ఉదాహరణగా ఇదే సంచికలో సీతారామ్ గారి వ్యాసం ఉంది. ఈ తరంవారికి అప్పటి జర్నలిజం మీద ఆసక్తి ఉన్నట్టయితే అందులో కొన్ని వివరాలు లభిస్తాయి.
August 21st, 2007 at 11:17 am
Mr. Kutumbarao’s, works are already well known to the world. But I feel Dr.Rohiniprasad is no less than his father, in writing skills. He is writing very informative & interesting articles about important topics, like music [in http://www.eemaata.com and about History, Science and now about Oceans [in http://www.apweekly.com. In fact, after reading his articles, I got more interested in History and Science.
September 5th, 2007 at 2:28 am
వ్యాసం చాలా బాగుంది. ఆసక్తికరంగా వుంది.
August 21st, 2008 at 9:14 am
రోహినీ ప్రసాదు గారిక
ధన్య వాదాలు మీరు science మాత్రమె రాయగలరెమొ అనుకున్నను
HETUVAADI LO MEE RACHANALANU konni samacharaalugaa chadyu tunnanu
mee venuka antuleni cahritra goppa vaarasatyam undi
mee naanna gaari veelayinanni memoirs raastaarani aa situnnanu
mee naanna gaari chaallaa rachanalu mukyam gaa sahitya vaysaalu naaku chalaa istam
hope a lot from u
November 1st, 2009 at 8:29 am
[...] మాసపత్రికల్లో ఎన్నో సందర్భాల్లో జర్నలిస్ట్గా పనిచెయ్యడం ఆయనకు లాభించింది. అలాగే [...]