ప్రాణహిత

ఈ ప్రపంచంలో
పుట్టడమే నీ ఘనత
నిన్ను మోసి, కని, లాలించి, ప్రేమించి
నీ చేతే ఛీత్కరింప బడటం స్థితి

రెందు హృదయాల
రెండు జీవితాల
రెండు సూత్రాల కలయిక పెళ్ళి
ఆ పెళ్ళప్పుడే నువ్వు నేర్చుకున్న మొదటి మంత్రం
యూజ్ అండ్ త్రో
ఉపయోగించుకో -
ఆనక
విసిరి పారేసుకో -
అన్ని చట్టాల, చుట్టాల అండదండలు నీకున్నాయ్
నువ్వేం చేసినా – నిన్ను మోసే మహామహులున్నారు.

(1)
ఆ – శరీరం
నిన్ను కొనుక్కున్నా
గుత్తాధిపత్యమంతా నీదే-
‘దిస్ ఏరియా బిలాంగ్స్ టు మి’
అనుకునే అధికారపు పట్టా
సమాజం నీకెప్పుడో ఇచ్చేసింది.
అందుకే చాన్నాళ్ళుగా
పుడుతూ, పుడుతూ, మళ్ళీ పుడుతూ
నువ్వు స్త్రీ- శరీరాన్నీ, బుద్ధినీ ఏలుతూనే వున్నావు.

(2) మరి, ఇప్పుడో-
విసిరి పారేస్తే మూలన పడివుండదు
అంతే వేగంగా ప్రశ్నతో మొలకెత్తిన
శిరసెత్తిన నారి కనిపిస్తుంది
ఈ శరీరాన్ని అనుభవిస్తాను
కాల్చి, కూల్చి వేసే హక్కు నాదే అన్న నీ కేకకి
జవాబిస్తున్న పొలికేకలు
ఈ శరీరం మీద సమస్తహక్కులూ నాకే
ఈ మనసు నాదే
నా ఊహల రూపశిల్పిని నేనే
నువ్వూ నేనూ కలిసుందామంటేనే
సమభాగస్తులమంటేనే
నీకూ నాకూ సంధి
లేకుంటే-
నువ్వూ నేనూ విడివిడి రూపాలం, దేహాలం
డబ్బే విలువనుకొని
మనిషి విలువ
తెలీని అజ్ఞానాహంకారంలో వున్నంతకాలం
నువ్వంతే-

(3)
రక్త సిక్త దేహాలతో మొరపెట్టుకోవడం లేదిక
స్వేచ్చా విత్తనంలో మొలకెత్తి నిలిచిన మహావృక్షాన్ని
ప్రశ్నించే చూపుడువేలు
ఇప్పుడు ప్రశ్నించే మొహాన్ని తొడుక్కుంది.
మాట్లాడుతోంది
అక్షరంతో మాట్లాడుతోంది.
వినబడటం లేదా? ఈ నారీ నాదం.

(4) నేను మనిషిని
వ్యక్తిత్వ స్థితీకృతరూపాన్ని
పరిపూర్ణ రూపాన్ని
శరీరమంతా కళ్ళు, చెవులు నిండివున్న దాన్ని
శరీరపు భాషను వినగలుగుతున్నాను
ప్రకంపనాలను చూడగలుగుతున్నాను
నువ్వు చెప్పిన ఆడదానిగా కాక,
మానసిగా, మానవిగా స్థిరపడినదాన్ని
ఇవ్వాల్టి నిజాన్ని నేను.