మే2008
నీడల మాటు
వాళ్ళు జీవితాన్ని
జీవితంలానే జీవించేవాళ్ళు
మెరిసే ఆకులలా
పరచిన నీడలా సంచరించేవాళ్ళు
తేనెటీగలకు రెక్క బలం నేర్పి
తేనె మూటగట్టటం తెలిసినవాళ్ళు
చివురు రాలకుండా
కొమ్మ విరవకుండా
ఒడినిండా కాయల్ని
ఒడుపుగా తెంపడం తెలిసినవాళ్ళు
అడవి వారిలో నాటుకుందో
వారే అడవిలో నాటుకున్నారో
తెలియదు
నిండు గంజికుండలో
ముఖం ముంచి నాకుతున్న
కుక్కని సాంతం తిననిచ్చి
మళ్ళీ ఒండుకోవడం తెలిసినవాళ్ళు
భుజాన గెంతి కూర్చున్న కోతిపిల్లను
చంకన బిడ్డతో పాటు మోసినవాళ్ళు
అయినా
ఎక్కడి నాగరీకమో
ఖాకీ బట్టలేసుకుని
వారి యజ్ఞవాటికల్లో
బీభత్సం సృష్టిస్తారని
కొండల్ని తవ్వి
ఎలుకల్ని చరుస్తారని
వారికేం తెలుసు!
పొగలు పెట్టినపుడు
ఏది స్పష్టంగా కనిపిస్తుందని!
ఒక్క మన నటన తప్ప
మన దానవత్వం తప్ప!
(వాకపల్లి గిరిజిన స్త్రీలపై జరిగిన హింసకు నిరసనగా)