ప్రాణహిత

సోక్రటీసు ను సోక్రటీసు గా చేయడం కోసం
ప్రపంచమంతా కుట్ర పన్నుతుంది
లోడొల్ల నిశ్చల నిశ్చితాల మధ్య
అతడికొక గయ్యాళి పెళ్ళాన్ని ఇస్తుంది

ఒక కవితో మంచి కవిత్వం రాయించడానికి
ప్రపంచమంతా కలిసి కుట్ర పన్నుతుంది
తిడుతుంది కొడుతుంది జైల్లో వేస్తుంది
ఎవరూ ఇంట్లోకి రానివ్వకుండా తలుపులు మూయిస్తుంది

నన్ను నన్నుగా చేయడానికి
ప్రపంచమంతా కలిసి కుట్ర పన్నుతుంది
అన్ని మధుర స్వప్నాలను పీడకలలుగా మార్చేస్తుంది
పూర్తిగా నాదయిన కథను నాతో రాయిస్తుంది