ప్రాణహిత

- హెచ్చార్కె

ఇంతింత కళ్ళతో
ఏమి చూస్తున్నావు
ముడిచిన పిడికిట్లో
ఏమి దాస్తున్నావు
నీలో నువ్వే నవ్వుకుంటావు
నన్ను చూసి అని మురిసిపోతాను
నీలో నువ్వే మాట్టాడుకుంటావు
అర్థాలు వివరించి చెప్పబోతాను

చెవులొగ్గి వింటాను
చెప్పరాదా కాస్త
భుజమెత్తి మోస్తాను
ఏమిటా రాస్యం
నిన్న సాయంత్రం
చలికాలం వచ్చిందని
స్వెటర్ తీసి మడతలు విప్పితే
మడతల్లోంచి నవ్వుతూ చిన్న గడ్డిపువ్వు

నా దేశానికి వస్తూ
నిన్ను ముట్టుకుంటే
కోపంగా లాగేసుకున్న
నీ చిట్టి చెయ్యిని గుర్తు చేసింది
మేపుల్ చెట్ల నీడల్లో
నీ ఆటపాటల గురించి
కల గంటూ నేను
ఎత్తుకుని
నిన్ను ముద్దాడుతుందని
మీ లాన్లో వీపింగ్ చెర్రీ మీద అసూయ

నాకొద్దు దేశాలు
ఒద్దుపన్యాసాలు
నీ నవ్వులు నీ ఏడుపు
ఉంగా ఉంగా భాషలో
నువ్వు కట్టే కవనాలు
ధ్వనించే చోటులలో
పుట్టడం కోసం
చనిపోవాలనుంది నాకు
మళ్ళీ మళ్ళీ