ఉద్యమాలు ఎట్ల నడవాల్నో,
ఉద్యమాలకు ఎవరు నాయకత్వం వహించాల్నో
కంప్యూటర్ల ముందు కూసోని నువ్వు నేను నిర్ణయించలేం కదా.

బద్మాష్‌ రాజకీయాల మధ్య మనుగడసాగిస్తున్న తరం మనది.
ఎవడు సొక్కంగున్నడు చెప్పు?
ఎవడు ఎప్పుడు ఏం పాట పాడ్తడో, ఏ బాటపడ్తడో తెలవకపాయె.
పార్టీలు ఎన్నికల ముందు చెప్పే మాటలకు, ఎన్నికలైనంక ఏసే వేషాలకు, మోసాలకు లెక్కేలేదాయె.
ఒక నీచ్‌ కమీనే కుత్తే గాడు కూడా అసెంబ్లీకి పార్లమెంట్‌కి ఎన్నికై నిజాయితీపరుల నెత్తిమీద సవారి చేసేందుకు పుష్కలంగ అవకాశం వున్న ఎన్నికల వ్యవస్థమనది.
ఎట్లెన్నుకున్నరని ప్రజల్ని తప్పు పడితే ఫాయిదా ఏముంటది?

…..దొంగనోట్ల దొంగ ఓట్ల రాజ్యం ఒక రాజ్యమా?????
…..లంచగొండి వెధవలిచ్చు సాక్ష్యం ఒక సాక్ష్యమా ??????
అన్నడు శ్రీశ్రీ. (అన్నట్టు శ్రీశ్రీకి ఆంధ్రలో కంటే తెలంగాణలనే మస్తు ఫాలోయర్స్‌ వున్నరు. అట్లనే సి.నారాయణరెడ్డికి తెలంగాణల కంటే ఆంధ్రల ఎక్కువమంది దోస్తులున్నరు)

తెలంగాణ ప్రజలు తమ తెలంగాణా రాష్ట్రం తమకు కావాలని కోరుకుంటున్నరా లేదా అన్న విషయం ప్రజాభిప్రాయ సేకరణ జరిపితే ఒక్కపూటలో తేలిపోతది.
కాని అట్ల తేలనిస్తరా ఈ బటాచోర్‌ నాయకులు.
వారికి అంత నిజాయితీవుంటే మన బతుకులు గిట్లెందుకుంటయి.

జనం అడిగి అడిగి, పోరాడి పోరాడి, తన్నులు తిని తన్నులు తిని అ లసి, సొలసి సొమ్మసిల్లేదాక తమాష చూస్తరు.
ఎసొంటి ఉద్యమమైనా నాల్రోజులు సాగదీస్తే అదే సల్లబడ్తదని వాళ్ల ప్లాన్‌.

తెలంగాణా వచ్చినంక ఎవరు బాగు పడ్తరు? ఎవరు రాజ్యం చేస్తరు? ఎట్లాంటి వ్యవస్థ ఏర్పడతది? రోడ్డు మ్యాపేంటిది? డాక్యుమెంటు తయారుచేసిండ్లా లేదా? గవన్ని ఫుజూల్‌ మాటలు.
తెల్లదొరల దొరల పాలన పోయి నల్లదొరల పాలన వచ్చినంక సామాన్య జనానికి (మాలమాదిగలకు, బడుగుబలహీన వర్గాలకు) ఒరిగిందేమున్నది?

ముందు ఆంధ్ర దొరల భల్లూకపు పట్టునుంచి తెలంగాణ బయటపడితే చాలు.
తెలంగాణ దొరల సంగతి తర్వాత చూసుకోవచ్చు. మేం ఇప్పుడు కోరుకుంటున్నది గంతే.
తెలంగాణా ఏర్పడినంక ఏ ప్రగతి శీలశక్తులూ నిరాశపడవు. వాళ్ల పోరాటం, వాళ్ల ప్రయత్నం ఎప్పటిలాగే కొనసాగుతుంది. ఇదొక చిన్న మజిలీ మాత్రమే. కాబట్టి మీరు బేఫికరుగ వుండుండ్రి.
ప్రజల్లో రోజురోజుకు చైతన్యం పెరుగుతున్నది.

కెసిఆర్‌ గానీ మరొకడు గానీ జనాన్ని ఎంతోకాలం మోసం చేసుకుంటుపోలేరు.
ఆంధ్రా తెలంగాణా భాయి భాయి.

జై తెలంగాణా! జై ఆంధ్ర!