ప్రాణహిత

ప్రశ్నించండి ప్రశ్నించండి

ఆదిమానవుడు ప్రకృతి ఒడిలోని
వేసిన పెనుకేకలా
ప్రశ్నించడం నేర్చుకోండి
యుద్ధం ప్రారంభానికి ముందు
ద్రౌపదిలా ప్రశ్నించండి
యుద్ధం మొదలయ్యేదే
ప్రశ్నతోనే కదా
ప్రశ్నించకపోతే
ఇంతదూరం ప్రయాణించేవాళ్ళమా?
ప్రశ్న ప్రవాహ వురవడితోనే
రాపిడితోనే నేటి
మన ఆకృతి దాల్చాం
మనిషి ఎప్పటికీ ఆదిమతత్వంతోనే
మొదలవ్వాలి
తనకనులపై కమ్ముకునే
మాయ పొరలను
తన నాభినుండి తన్నుకు వచ్చే
ప్రశ్న మాత్రమే తొలగించగలదు. .
ప్రశ్న మాత్రమే ఎప్పటికీ
నిజమైన నేస్తం